पानांचे सोने नको, झाडांचे सोने वाढवा!

महाराष्ट्रात दसऱ्याच्या दिवशी आपट्याची पाने सोने म्हणून वाटण्याची परंपरा आहे. या परंपरेला पर्यावरणपूरक स्वरूप देत प्रत्येकाने आपट्याचे रोप लावावे, त्याचे संगोपन करावे आणि पुढील पिढीपर्यंत निसर्गसंवर्धनाची संस्कृती पोहोचवावी, हा या उपक्रमाचा मुख्य उद्देश आहे.

प्रभू श्रीरामांच्या विजयाची प्रेरणा घेऊन समाजाने पर्यावरणाकडे दुर्लक्ष करण्याच्या प्रवृत्तीवर मात करावी आणि केवळ सणापुरते नव्हे, तर वर्षभर निसर्ग संवर्धनासाठी योगदान द्यावे, असा संदेश या उपक्रमातून देण्यात आला.

पीसटेक फाउंडेशनच्या या उपक्रमामागे केवळ रोपांचे वितरण हा उद्देश नसून, सण साजरे करण्याच्या पद्धतीत पर्यावरणपूरक बदल घडवून आणण्याची व्यापक संकल्पना आहे. प्रत्येक व्यक्तीने दरवर्षी दसऱ्याला किमान एक आपट्याचे रोप लावून त्याचे संगोपन करावे, असे आवाहन करण्यात आले.

११०८ आपट्याची रोपे म्हणजे निसर्गाशी नाते जोडण्याच्या ११०८ संधी आहेत. या रोपांची योग्य ठिकाणी लागवड करून त्यांचे संगोपन झाल्यास पर्यावरण संवर्धनाच्या दृष्टीने या उपक्रमाचा सकारात्मक परिणाम साधता येईल.